喺2009年嘅首屆"D23 Expo" 中，WDC就首次展出咗香港迪士尼樂園最新擴建工程嘅模型以及相關資料，而當中嘅「迷離莊園」主題園區更吸引到唔少Disney Fans 嘅目光。因為當中盡顯咗一眾「迪士尼幻想工程師」們嘅神奇魔法。而五年後嘅今日，呢個「鎮園之寶」終於正式開幕啦！宜家就先同大家分享莊園中嘅些少資料！
富有維多利亞式設計風格嘅「迷離大宅」(Mystic Manor) 係「迷離莊園」中嘅一座地標式建築，當中糅合咗世界各地嘅建築特色 (例如莫斯科圓形樓塔設計等等)，充份體現出亨利爵士周遊列國嘅豐富經歷。
「迷離莊園」嘅主人亨利爵士(Lord Henry Mystic) 係一位大名鼎鼎嘅探險家，佢最鍾意收藏位於世界各地嘅奇珍異品。而喺佢旁邊嘅就係爵士嘅得力助手兼最佳拍檔猴子阿拔(Albert) 啦！
而亨利爵士 為咗俾更多嘅探險家以及冒險家去欣賞佢嘅珍藏，故此佢就決定開放位於大宅下嘅地下室去俾大家參觀呢個館藏量超過7,000件展品嘅私人博物館！而大家亦都 將會乘坐由佢親自發明嘅全自動座駕「迷離莊園電磁廂車」(Mystic Magneto-Electric Carriage) 去參觀各個展覽區。當亨利爵士嘅助手猴子阿拔偷偷地去打開咗擁有神秘力量嘅音樂盒時，擁有神秘力量嘅「音樂星塵」因此而被釋放出來！一次奇幻嘅歷程由此展開！
「迷離大宅」內設有36座投影機，包括4座超高清4K級別投影機，炮製出40款嘅視覺特效。配合環轉車架嘅無軌系統廂車，任何時候都可以作全方位移動，隨時引領大家聚焦最精彩嘅故事部分，猶如置身私人移動劇院！
而首批於今日進入「迷離大宅」嘅賓客亦都可以聽到Noble嘅講解！
Noble M&G 時間：
「迷離珍藏店」(The Archive Shop) 內充滿住各國嘅色彩，而店內嘅主題商品系列圍繞四個特色主題，包括「迷離莊園」主題、米奇家族冒險主題、來自世界各地嘅迪士尼樂園精品以及各國工藝精品，合共超過140款商品任你去選擇！
「大冒險家餐廳」(The Explorer's Club Restaurant) 喺亨利爵士招待各國來賓以及與「探險家‧冒險家學會」(The Society of Explorers and Adventurers) 成員聚會嘅主要場所。餐廳共分為中國、摩洛哥、印度、俄羅斯及埃及 五個主題區，提供16款特色美食。而當中可容納500位賓客，其中100個更係室外座位。大家可以一邊觀賞特色裝潢，一邊細嚐各地美食。 (在此感謝相中Cast Members們嘅「甫士」相！)
「迷離莊園」從細節著手，園區內擺放超過7,000件道具展品，展品之豐富令故事情節更加深刻。喺「迷離大宅」外嘅「奇幻庭園」(Garden of Wonders)，就放置咗多件3D立體錯視效果嘅古代雕塑及畫作。只要大家從特定嘅角度去欣賞就可以揭開箇中奧秘！
「迷離莊園車站」(Mystic Point Freight Depot) 係為亨利爵士運送世界各地珍藏品而設既。亨利爵士嘅姪孫更會喺車站上分享跟爵士周遊列國嘅奇趣經歷，並會邀請旅途上遇到嘅朋友與大家見面。呢班文化大使來自埃及、保加利亞、北美洲、印度 和 墨西哥，並將以富有民族特色的服飾及扮相出現，凸顯了「迷離莊園」嘅異國風情色彩。大家準備好參加呢個「迷離莊園世界民族大使見面會」 (Mystic Point Ambassador Announcement and Meet & Greet) 未呢？
除咗一眾「迪士尼幻想工程師」們嘅匠心設計外，樂園更邀請咗著名荷里活配樂大師丹尼·艾夫曼 (Danny Elfman) 為「迷離莊園」創作配樂！
齊齊畫Albert！
華特‧迪士尼先生曾經講過：「只要喺呢個世界上仲存有夢想，迪士尼樂園將會永遠地延續下去」，多謝各位「迪士尼幻想工程師」將呢個"Super E-ticket" 帶俾我哋！再次慶祝「迷離莊園」經已正式開幕！
在此提提各位「奇妙處處通」會員，為慶祝現有擴建工程嘅壓軸項目「迷離莊園」之落成，大家於2013年5月17日至6月30日期間免費換領「迷離莊園」奇幻3D眼界遊戲卡一張，為奇幻歷程留下紀念。
「迷離莊園」全新版嘅官網亦已經登場啦！歡迎按此前往瀏覽。
而本blog 嘅編輯亦都有幸喺今日參加「與『迷離莊園』幕後大師對話」活動！而當中嘅內容會將於稍後一篇為大家深入地介紹本園區以及分享其故事嘅網誌中一併介紹，敬請期待！
全球獨有嘅「迷離莊園」將你帶入一個超乎想像嘅奇幻之旅。究竟眼前所發生嘅一切係千真萬確？定係奇異幻覺？誠邀你親歷探索！
COMMENTS