2008年，香港迪士尼樂園增設咗「歌舞青春熱跳速遞」、「哈囉阿古」、「小小世界」以及「布公仔流動實驗室」四個遊樂設施，而時至今日只餘下「小小世 界」。原定於2008年2月16日先登場嘅「布公仔流動實驗室」於2008年2月14日首度亮相，並且為上圖中嘅呢一對情人送上祝福。
於 2009年榮獲國際主題遊樂園權威組織"Thea Awards" 頒發「最出色科技成就大獎」嘅「布公仔流動實驗」之主人翁為「火蜜瓜博士」(Dr. Bunsen Honeydew) 以及佢嘅得力助手「尖嘴」(Beaker)，而佢哋會乘坐嗰架貌似太空船嘅雙輪蛋形流動實驗車與賓客分享佢哋嘅科學知識。
「火蜜瓜博士」與「尖嘴」係利用咗Disney嘅Audio-Animatronics ® 專利技術去與賓客互動以及進行天馬行空嘅古怪互動實驗。佢哋嘅流動實驗車備有各種新奇玩意，包括五彩紙炮、噴水器、煙霧及一啲意想不到嘅特別效果，而「火蜜瓜博士」亦會經常喺出其不意的情況下要賓客考驗佢對科學嘅常識，逗得賓客捧腹大笑！
唔知道大家仲記唔記得佢哋喺聖誕節嘅特別發明呢？
「火蜜瓜博士」以及「尖嘴」係美國家傳戶曉嘅電視節目《前譯﹕布公仔樂園》「The Muppet Show」中嘅主要角色之一。喺呢個載歌載舞嘅綜藝節目中，每一集均由一眾布公仔，包括為人熟悉及愛戴嘅青蛙卻迪 (Kermit the Frog)、豬小姐(Miss Piggy) 以及名人嘉賓參與演出，以風趣幽默嘅手法娛樂觀眾。而「火蜜瓜博士」則係該節目中唯一一位科學家，佢嘅英文名源於科學儀器本生燈(Bunsen burner) 以及佢好似蜜瓜(Honeydew) 般嘅頭形。
全球只有一個嘅「布公仔流動實驗室」將會繼續巡迴世界各地嘅Disney Parks 與賓客見面。科學精神永長存，「布公仔流動實驗」，我哋後會有期！多謝「火蜜瓜博士」同埋「尖嘴」為我哋帶來不少歡樂以及知識上嘅啟發。
Hong Kong Disneyland Resort
COMMENTS