Blog Banners

歡迎到訪本網誌!  |  Welcome to visit this blog!

2014年12月22日 星期一

電影觀後分享:《大英雄聯盟》

迪士尼《大英雄聯盟》(“Big Hero 6”)已經正式上畫喇!唔知道大家又睇咗未呢?嚟到本blog《電影觀後分享》系列嘅第6篇專題網誌,今次就同大家分享一下《大英雄聯盟》嘅觀後感。

******************************************************************
注意!以下內容含有劇透成份,keep "magic" 者敬請留意! 

******************************************************************


改編自Marvel同名漫畫系列
自Marvel喺2009年加入華特迪士尼公司之後, 大家都會開始見到Marvel嘅元素喺迪士尼嘅唔同業務出現,當中包括樂園以及Disney Store等等,而Marvel Cinematic Universe嘅版圖亦不斷擴大。當官方公佈華特迪士尼動畫工作室將會推出呢個首個改編自Marvel同名漫畫系列嘅作品嘅時候,小編頓時有一個疑問 ── 究竟會係點樣嘅呢?

Marvel《Big Hero 6》漫畫系列喺1998年出版,各位可以從上圖見到相關嘅角色,而喺迪士尼《大英雄聯盟》動畫電影裡面亦包含咗一部分原著嘅元素。電影故事以14 歲機械人學神童濱田廣(HIRO HAMADA)為起點,因佢哥哥濱田正(TADASHI HAMADA)喺一場意外中不幸離世而令阿廣發現佢嘅「微型機械人」落入咗一個想復仇嘅壞人手中。雖然故事開首用咗較多嘅時間去交代濱田廣嘅背景,但導演亦喺故事入面清晰簡潔地介紹埋其餘五位英雄朋友,而「醫神」(BAYMAX)嘅造型更加係人見人愛添!值得一提嘅係呢齣電影比起其它迪士尼動畫電影有較多觸動人心嘅情節,而「醫神」喺尾聲拯救阿廣以及卡拉漢教授女兒嘅一幕更加令到小編流淚。之不過,導演喺結尾都安排咗一個較為令人滿意嘅結局。

另外,大家喺本齣電影入面仲會見到迪士尼嘅動畫技術嘅提升,特別係「三藩京市」(San Fransokyo)街道嘅真實感。華特迪士尼動畫工作室喺電影入面利用咗首度成功研發嘅先進電腦模擬運算程式「Hyperion」以及全新系統「Denizen」,前者有助改善電影嘅燈光效果,而後者就可以創造更大量嘅動畫人群場面。


向科學致敬
本齣電影有好多同科學有關嘅元素,由幾位主角嘅興趣以至電影嘅情節都離唔開科學。除此之外,「醫神」嘅靈感係來自卡內基美隆大學(Carnegie Mellon University)研究人員正在研發嘅軟身機械人,而電影尾聲嘅磁阻場通道亦參考咗加州理工學院(Caltech)物理學家所提供嘅意見。


Stan Lee 驚喜現身
如果閣下有留低睇片尾的話,大家都會見到Stan Lee以費德爸爸嘅身份現身喺電影入面。有睇開由Marvel Studios所出品嘅電影嘅讀者都會知道每個作品都有些少關聯嘅元素。至於迪士尼《大英雄聯盟》嘅故事其實仲有好多地方可以發展,而官方亦可以考慮以上映續集或者好似《獅子王》系列咁樣直接推出家庭影碟及電視劇集嚟延續呢六位英雄嘅故事。


**以上內容為編者個人意見。



Disney

沒有留言 :

張貼留言